RC PWANI KUWACHUKULIA HATUA KALI WENYEVITI WANAOHUSIKA NA KUCHANGIA MIGOGORO YA ARDHI

Na Victor Masangu,Pwani

Mkuu wa Mkoa wa Pwani Stanslaus Nyongo  amesema kwamba  atowafumbia macho hata kidogo baadhi ya wenyeviti wa serikali za mitaa na vitongoji ambao watabainika  kuwa wao ndio chanzo kikubwa la  chimbuko la  kutokea kwa migogoro ya ardhi.

Nyongo ametoa kauli hiyo wakati wa kikao kazi cha kupitia andiko la mwongozo wa uwekezaji katika Mkoa wa Pwani kilichohudhuliwa na viongozi mbali mbali wakiwemo wakuu wa Wilaya,wakurugenzi wa Halmashauri pamoja na viongozi wengine zikiwemo taasisi wezeshi.

Mkuu huyo wa Mkoa amebainisha kuwa kukamilia kwa andiko la  mwongozo wa  uwekezaji  utaweza kusaidia kwa kiasi kikubwa katika kuwavutia wawekezaji kutoka maeneo mbali mbali ya ndani na nje ya nchi.

Nyongo amesema kumekuwepo na baadhi ya migogoro ya ardhi katika Mkoa wa Pwani ambayo mingine inachangiwa na wenyeviti wa serikali za mitaa na vitongoji hivyo ameahidi kuwachukulia hatua kali za kisheria ili iwe fundisho kwa wengine.

"Tupo katika kikao hiki cha kupitia andiko la mwongozo wa uwekezaji Mkoa wa Pwani lakini kuna baadhi ya wenyeviti wa serikali za mitaa na vitongoji wao ndio wamekuwa ni chimbuko la migogoro ya ardhi na kwamba wale wote  watakaobainika tutawaondoa,"amebainisha Nyongo.

Aidha Nyongo amebainisha kwamba mwongozo huo wa uwekezaji katika Mkoa wa Pwani  utakuwa ni mkombozi mkubwa sana katika suala zima la kuwekeza katika nyanja mbali mbali ikiwemo upatikanaji wa fursa za ajira.

Katika hatua nyingine Mkuu huyo wa Mkoa hakusita kuwahimiza wakuu wote wa Wilaya kuhakikisha wanapambana katika kuyalinda na kuyatunza maeneo waliyonayo ili yasiweze kuvamiwa na baadhi ya watu ili kuweza kuepukana na migogoro ya ardhi.

Kwa upande wake Mkuu wa Wilaya ya Bagamoyo Shaibu Ndemanga amesema kwamba ana imani kubwa  mwongozo huo wa uwekezaji katika Mkoa wa Pwani utaleta mabadiliko ya kiuchumi kupitia wawekezaji  mbali mbali.

Naye Mwenywekiti wa Halmashauri  ya Kisarawe Idan Kitare ameupongeza  mpango huo ambao utaweza  kuleta  tija zaidi hasa katika maeneo ambayo tayari yametengwa kwa ajili ya shughuli za  uwekezaji.

Awali mkurugenzi mtendaji wa Taasisi huru ya utafiti  wa sera za kiuchumi na kijamii  nchini Tanzania (ESRF) Professa Fortunata Makene amesema  mwongozo huo utasaidia kuchochea mageuzi makubwa katika fursa za ajira.

Mwongozo huo wa uwekezaji katika Mkoa wa Pwani pindi utakapokuja kuzinduliwa rasmi utakuwa ni mkombozi mkubwa katika kuwapatia fursa wawekezaji wa ndani na nje ya nchi kuja kuwekeza katika sekta mbali mbali.