KAMPUNI YA MAHINDRA KWA KUSHIRIKIANA NA GF TRUCK KUANZA KUZALISHA MAGARI NCHINI

NA ABRAHAM NTAMBARA

KAMPUNI ya Mahindra kutoka India kwa ubia na Kampuni ya GF Truck wanatarajia kuanza uzalishaji na uuzaji wa magari hapa nchini.

Hayo yamebainishwa leo Desemba 5, 2023 na Waziri wa Nchi, Ofisi ya Rais, Mipango na Uwekezaji, Profesa Kitila Mkumbo katika hafla ya uzinduzi wa uwepo Kampuni ya Mahindra nchini sambamba na uzinduzi wa magari yaliyozalishwa na Kampuni hiyo kwa ushirikiano na GF Truck.

Prof. Mkumbo ameeleza kuwa uzalishaji wa magari hayo nchini unatarajia kuanza miezi sita ijayo kuanzia hivi sasa.

Hivyo Waziri Prof. Mkumbo amesema kutokana na Kampuni kuzalisha magari nchini, Serikali ina mpango wa kuifanyia marekebisho sheria ya uagizaji magari nchini ambayo inaruhusu hadi magari chakavu kuingia nchini ili kuzuia magari hayo na kulinda maslahi ya Viwanda  vya uzalishaji wa magari nchini.

Waziri Prof. Mkumbo amesisitiza kwa kusema kwamba,  kwa sasa hapa nchini kumekuwa na viwanda vinavyotengeneza magari hivyo ni wakati wa kubadilisha sheria ya uigizaji magari.

"Sheria ya sasa inaruhusu mpaka magari chakavu yaingie nchini hivyo sheria tutaibadilishe ili kulinda viwanda hivi vinavyozalisha magari hapa nchini,” amesema Prof. Mkumbo.

Hata hivyo, Prof. Mkumbo amesema ujio wa kampuni ya Mahindra ni matokeo ya ziara ya Rais wa Jamhuri wa Muungano wa Tanzania aliyoifanya nchini India mwezi Oktoba mwaka huu ambapo alikutana na kuzungumza na wawekezaji mbalimbali.

"Haya ni matunda ya ziara ya Rais Samia nchini India imepelekea ujio wa Kampuni hii kikubwa kuja kuwekeza hapa nchini,” ameongeza l.

Kwa Upande wake, Mkurugenzi Mtendaji wa Kituo cha Uwekezaji Tanzania (TIC), Gilead Teri, amesema kwa sasa hali ya uwekezaji Tanzania ni nzuri huku akiwataka Watanzania kujitokeza kwenye uwekezaji kwa kushirikiana wa wageni kutoka nje.

"Kama wewe Mtanzania unakiwanja, nyumba, shule, kiwanda na unataka ubia na mwekezaji njoo kwetu sisi tutakutafutia uwekezaji na mbia,” amesema Teri.

Naye Mkurugenzi Mtendaji wa GF Group, Iman Karmali, amesema wapo nchini kwa miaka 17 na wameweza na kutoa ajira za moja kwa moja kwa Watanzania zaidi ya 250 na kubainisha kuwa GF Group na Mahindra mwakani wataanza kuzarisha magari madogo.